بلوچ یکجھتی کمیٹی ءِ سروک ڈاکٹر مھرنگ بلوچ ءَ چاگردی رسانکدر ( ایکس ) ءَ ماں شنگ کرتگیں تامربندے ءَ گوشتگ که 25 جنوری ءَ دالبندین ءَ راجی مچی یے برجم دارگ بوگ ءَ اِنت ءُ ھمے درگت ءَ چه بلوچستان ءِ جتا جتائیں ھند ءُ دمگاں زوربیگواھیں مردمانی کھولاں ھوار آ دگه مردمانی ھم مزنیں کچے ءَ کاروان اتکگ ءُ دالبندین ءَ سر بیتگ اَنت.
آئی ءَ گوشتگ که پاکستانی ریاست ءَ انچش که گوادر ءِ راجی مچی ءِ وھد ءَ زوراکی کرتگ انوں ھم وتی زوراکیاں کارمرز کنگ ءَ اِنت. آئی ءَ بی وائی سی ءِ کارکن ءُ ھما لس مھلوک که آیاں نوکنڈی، چاگی ءُ نسیرآباد ءَ ھوار بلوچستان ءِ جتائیں ھنداں بلوچ چکچینی ءِ بگیری ءَ اِے زرمبشت ءِ ھمراھداری کرتگ آیانی بگیری ءَ ایپ آئی آر نبشتگ. چه ایشی ءَ اَبید سرکاری کارمند ھم بیھار دیگ بیتگ اَنت که دالبندین ءِ راجی مچی ءَ بھر مه زور اَنت.
ڈاکٹر مھرنگ ءَ گوشتگ که انوں سرجمیں دالبندن ءَ دامگ بند بیتگ ءُ مارا ھمے تُرس اِنت که ریاست گوادر ءِ راجی مچی ءِ وڑ ءَ دالبندن ءَ ھم زوراکی مه کنت. بلے چه ایشی ءَ ابید ھم من گوں سرجمیں راج ءَ دزبندی کناں که راجی مچی ءِ پله مرزی ءَ به کن اَنت ءُ 25 جنوری ءَ وت ءَ دالبندین ءَ سر به کن اَنت ءُ ریاست ءَ ھمے کلوه ءَ به دے اَنت که بلوچ وتی چکچینی ءِ بگیری ءِ یکجاه ءَ اوشتاتگ.
آئی ءَ گوشتگ که ما ھمے سرپد به اِیں که ریاست راجی مچی ءِ بگیری ءَ راھانی بند کنگ ءِ جھد ءَ کنت ھمے ھاتر ءَ من گوں نوشکی ، ھاران ءُ آ دگه ھندانی مردماں لوٹ کناں که راجی مچی ءَ آیوکیں کاروانانی مردماں کمک به کن اَنت ءُ آیاں راھاں پیش به دار اَنت. دالبندین ءِ مردماں وتی گسانی دروازگ په راجی مچی ءَ اتکگیں مردماں پچ کرتگ ءُ ریاست ءَ ھمے کلوه داتگ که اگاں ھر وڑیں زوراکی کارمرز به کنت بلے ما ھور ءُ یکجاه اِیں.
ڈاکٹر ماھرنگ ءَ گوشتگ که اِے زرمبشت په مئے باندات ءِ ھاتر ءَ اِنت ءُ اِے وھد ءَ پاکستانی ریاست مئے چار اَدار ءِ دیوانے ءَ ھم سگ اِت نه کنت که بلوچ په وتی بُنکی ھکاں زھرشانی به کن اَنت.
آئی ءَ گوشتگ که 25 جنوری ھما روچ اِنت که اِے روچ ءِ ته ءَ توتک ءِ مچی مانش دزکپتگ اَنت ءُ ھمے روچ ءَ مارا یکجاه بوگ ءُ ریاست ءَ اِے کلوه دیگے اِنت که آئی ءِ زوراکیاں ابید ھم ما نه اوشت اِیں.
ڈاکٹر مھرنگ ءَ گوشتگ که مرچی شھید ھمدان ءِ کھول ءِ ھواری ءَ ھما مردم که گوادر ء راجی مچی ءِ میان ءَ ریاست ءِ دست ءَ ٹپی بیتگ اَنت آ ھم مرچی دالبندین ءَ اتکگ ءُ ساڑی اَنت. اِے کاروان نه اوشت ایت. من گوں بلوچ راج ءَ دزبندی کناں که بیا اَنت ءُ کاروان ءِ ته ءَ ھوار به بنت.
